Act 12 | TVK | STEP | E melele nen tak, Suv Toto Herot pol ni sakpurunien bemei xat ngan xil te sias tahal Serusalem.

Acts 12

Suv Toto Herot Pol ni Sakpurunien Ba Xat Kristin Xil

1 E melele nen tak, Suv Toto Herot pol ni sakpurunien bemei xat ngan xil te sias tahal Serusalem. 2 Misemae ni rut moletin nan xil te vaeen laba lada xoteh hurae Temis, xa tunali Sion. 3 Melele taxa pusi xa Siu xil lamaal ve neta xa pol ni, ma misa sepinien tengan ha lital xat Pita mun. Xi pol ni mak momal e Melengien xil te Beret xa Is Tovuol En. ^{▼▼12:3 Melengien xil te Beret xa Is Tovuol En: E huram xil ngasen, melengien tol e he sav (8) Siu xil di langga beret xa is tovuol en tengan lanem rilomun ni melele xa latetemanon latehe reling hal Isip (Eks 12:1-14).} 4 Melele xa ladal xat Pita, langguri ba e lalingi e nim te xeih. E Herot misemae ni vanut moletin te vaeen hat tengan ti liketeh xole. Herot minemi bit itutou ni Anien te Tavien, ^{▼▼12:4 Anien te Tavien: Siu xil lapol ni Anien ak e melengien kokot vari te Melengien xil te Beret xa Is Tovuol En tengan lanem rilomun ni melele xa masxaxa xil na Hi lathas muimol xil ngasen tahal Isip. E muimol na Siu xil, re sipsip xa latekas puiteh mae xil ni, tesak ni Hi tetavi e xil (Eks 12:15-20).} ihuri imei pe met moletin xil, e ilepisi. 5 E melele xa Pita da tamu e nim te xeih, ngan xil te sias tahal Serusalem di latangel ni ti sisen ven.

Pita Ven Mase Ra Nim te Xeih

6 Diamu e melele xa Herot bit ihur Pita ha ilepisi, e vongien nen momal, Pita di pat e nim te xeih. Hen xalu labar xati ni sen e moletin te vaeen lu ludi e rin xalu. E puiteh te nim te xeih, moletin lu mun lusoh ludi e hale. 7 Vatakes, masxaxa tei na Suv mei mistal, e miehen tei mileluv xol ut xa Pita da en. Xi dil valxou Pita e milale ni. Di, biteni mini bitene, “!Temanon! !Tamea!” Vatakes, sen meluv reling hen, mot be tan. 8 Masxaxa biteni mini bitene, “Lihi xat atuatu nam e hes xat sandel nam.” Ma Pita pol ni mak. Di, masxaxa biteni mun mini bitene, “Using ni kot nam e uhusil nou.” 9 Ma Pita mitamea, nggusil masxaxa lustal ra nim te xeih. E di minemi bit holesok xil ak tave reitin ti, be metuveen tei tang. 10 Lukakao luba luli vanut moletin te vaeen tei. Di, lukakao luba vuma ... luli vanut moletin te vaeen tei mun. E melele xa luduxoh puiteh te vioh te nim te xeih xa be aean, lupusi xa misaha tasen. Ma lustal e lukakao e suse tei e Serusalem luba. Vatakes, masxaxa ak be relingi e Pita mikameti xa misoh tasen.

11 Di, Pita minem kil neta xa mistal mini e misep tasen bitene, “!Be reitin! Hi Suv misa masxaxa nan bemei tengan vahur rat nou ra he Suv Toto Herot e ra holesok xil xa Siu xil di lanemi labit ti lipol ni minou.”

12 Melele xa Pita minem kila rilomun, xi ba be nim ma Meri, nine Sion Mak. E rute ak, moletin xil holu xa laneket ladi vituei e di lasis. 13 Melele xa Pita bemei mirei puiteh, atou te polien tei bemei xa hisen Roda e xi bit vakil ti visi iaxa de hale. 14 E melele xa atou ak milong kil rae Pita, mesep e memaal pupu. Tengan vasah puiteh, e xi miloh sung ba biteni mi ngan xil xa ladi nim bit, “!Pita, xi taxa misoh de hale xiak!”

15 Xil labit, “?!Otallang!?” E xi nggulehi dit biteni xa xi milong Pita mak. Ma xil labiteni mini labit, “Xos masxaxa nan tang iaxa di olonge iaxai.”

16 Melele xa di lasepin usili, Pita nggulehi dit miti puiteh vuma ... tei e xil misaha. E melele xa lapusi xa be xi reitin, lamesep pupu. 17 Pita mike xat xil nggo hen bit litit votei. Di, bit kila mi xil xa Suv iaxa misak ni mistal reling nim te xeih. Biteni mun mi xil bitene, “Muhit usil holesok xil ak mi Temis e ngan tesav xil mun xa laneket.” Di, be reling xil ba be rute sav.

18 E makoe nen, moletin te vaeen xil xa latling xil ti lateketeh xol Pita, lanexo pupu e di labit, “?Pita ba xave?” 19 Melele xa Herot milongeong ni, misil moletin te vaeen xil nan ba lalang ni, e xil mun latakameti ti. Di, misis pilei mereketeh xil ak. Di, misemae ni tengan lihas vin mereketeh xil ak. Dutou ni ngan ak, Herot be reling Sudea e ba di vuteili e Sesaria.

Suv Toto Herot Mat

20 Melele xa Herot di tamu e Sesaria, moletin xil tahal Taer e Saedon lapol ni neta tei xa misak ni ien minggat xil. Ma bit moletin xil nan lanasa ti mun anien mi xil. Ma moletin te rute xalu ak, lasil vanut moletin tei tengan lava lapus Herot. Diamu, lasis tutouen mi moletin tei na Herot xa nenesien nan di en, hisen Blastas. E del tutouen nan, Herot mae ni xa laling xat melengien tei tengan moletin xil tahal Taer e Saedon limei tengan lipol ni hitxatien te tomat itela.

21 E melengien teni, Herot mising ni eising tei xa bos xa bos na suv toto xil, e bemei dotan de hor nan. Di, misa sepinien tei ba mi xil. 22 Moletin xil labit lisak ni valonge vahos, ma lakei ba ni labitene, “!Rae nam taxoni moletin sav ti! !Rae nan nggoni hi tei vari!” 23 Herot milong sepinien nae e mae ni xil labiteni mak, e tasa ti merereen vaha mi Hi. Misak ni, vatei takes, masxaxa tei na Hi Suv bemei e pol ni mesei. Tavehi ti, tomasis xil labe tinen e langga ni vuma ... mat.

24 E sepinien eo na Hi xa Herot di tevae tetela, xi mei mahulong mu e mikapis ut xil ngasen.

25 E melele xa Banabas e Sol lupol vuol ni polien xil xa sias tahal Antiok latesa xalu lutehe Serusalem ven tengan lalsa tutouen mi hoeo xil, ludilomun lube Antiok, e Sion Mak ba xatel. ^{▼▼12:25 Polien 11:29-30}